قصيدة الابراج

كان ممكن اكون حمل
وامارس البطولة
من فوق اعلى جبل
واناطح ف السما
وادوق منها العما
واغامر بالحياه
وانافس الأزل

كان ممكن اكون تور
وف مايو الف ودور
واعاند ف الحقوق
واكابر ف الامور
واسابق الغزلان
واصارع النمور
بقرون فروع شجر

كان ممكن اكون جوزاء
دائي مالو دواء
الحلو عنده كتير
والزعلة بكربلاء
والوقت منه ضايع
والضربه فيها جزاء

كان ممكن اكون سرطان
ف الليل ابات حيران
ف الحيره انام غضبان
واخاف من الوحده
واشكى من الحرمان

كان ممكن اكون اسد
صوتي يهز الكون
عرشي يعيش للابد
جوايا قلب حنون
مصلحتة فوق البلد

كان ممكن اكون عذراء
اسوّد الانباء
واناكف ف الاراء
واشمع الاسماء
واضارب ف الغلاء
وابيع من غير شراءد

كان ممكن اكون ميزان
على كل لون فنان
انادي ف مظاهرات
لاباطل تاخده مني
ولا حق كمان

كان ممكن اكون عقرب
بالراحه ادوب واقرب
وف لحظه امل واهرب
واغير ع روحي مني
واندم واشوفلي مخرج

كان ممكن اكون قوس
واتعلم من الدروس
اكيف ع ناس ادوس
وارتاح من المجامله
واضرب ف وش بوز
عشان مزعل لما
تضيع مني الفلوس

كان ممكن اكون جدي
مدبوح بغير اوانه
مفطوم ع احزانه
طايح طواحين الهوا
جايب لنفسه العيا
شريان تاجه الطموح
لازمله كمان اوعيه

كان ممكن اكون حوت
او حتى حتشبسوت
نمروده باعلى صوتي
ف الشله دكتاتورة
ع الدنيا امبراطوره
يوماتي اعمل عمله
ومافي حقيقه كامله
ولابكشف اي كروت

انا دلو رغم انفي
انا كائن حلو منسي
موهوب طالب رعايه
مغمور طالب دعايه
ع الحبل يعرف يمشي
ف الحب يلبس كرسي
المويه هي رمزه
وهواه ف الدنيا يسري

..............................
للكاتبة: حنان مفيد فوزي

كتير حلوة شكرا الك